مرحبا بك زائرنا الكريم فى منتديات عمارة البنا الرجاء التكرم بالتسجيل والانضمام الى اسرتنا



 
الرئيسيةمكتبة الصورس .و .جبحـثالأعضاءالمجموعاتالتسجيلدخول

شاطر | 
 

 (العمدة جابر ود خف الفيل

اذهب الى الأسفل 
كاتب الموضوعرسالة
yousif
Admin
avatar

عدد المساهمات : 83
تاريخ التسجيل : 22/12/2011
العمر : 39

مُساهمةموضوع: (العمدة جابر ود خف الفيل   الأحد مارس 10, 2013 11:25 pm


العُمْدَة جابِر
والصباح نَديان رطيب
في اِيدو كان مَاسْك الشروق
في جيبو كان طاوي الغروب
في كرْشُو قَاعِد منْبَسِط
في الكُرسي كان
مَاهِل خصيب
ما عُمْدَة يَاخْ
والفرَح أِْكَال يطِيب
الشَيَّهْ والجمر الشَّهي
الشِيشَهْ والشَّنَب المولِّع حُمَّى
قِفْ
العُمْدَة جابر - الكرسى طَقْطَق تِحْتُو-
مَدَّ ايدو على الأوامرِ
والأوامِر ما بتطْلَع بَسْ كلام
مِن جسمو بِتْنِز
مِن حَشَاهو
مِن صلَف مَعْمور وعامر
مِن قبور أجدادو تزحف
للأصاغِر ..والأكابِر
مِن منابِت شَعَرو تَطْلَع
مِن نهايات الأظافر
دَه الصباح
العُمدة جابِر
نَادَى صالِح وَدْ قِنِعْنَا
الله ..الله على الأوامِر:
إسْتَلِم يا وَدْ قِنعْنَا
تسْتَلِم أَمْر الأوائل
تَلْقَى طالِع للأواخِر
تَسْتَلِم أمْر اللِّى عايش
تلْقَى من أهل المقابِر
واوْعَىَ من فضلك تَغَالِط
دِى الأوامِر ودِى الدفاتِر
ودِى العساكِر
وافتَح السِّكهْ اليَمُر
سيدنا آمر ابن جابر
واسْتَلِم يا وَدْ قِنِعْنَا :
إنتَ عارِف بيت سُعاد
وعارف إنَّك من قَبيلَة
لا رأينَا ولا سِمِعنْا
ولا عِشمْنَا ولا طِمعْنَا
وانت مُرْسَال يا ..بَجَم
تدخل البيت زى كأنّك..
مارِق الآن من جهنم
ولمَّا تَطْلَع ليكْ سُعاد
كُون خفيف زي الأمل
ومرَّة أتْقَل زي جَبَل :
أوْعَىَ تَفْرَح أوْعَى تزْعَل
واقْصِر ايدك من سلام
خلّي نَظَركْ يِكُون كفيف
ومَشِيكْ يكون ناعم مُغرْبَل
ولما تَطْلع ليك سُعاد
زي حلم في توب رهيف
أدّيهَا ضَهَركْ يا مُغفّل
وبكُلِّ ما علّمْتُو ليكْ
من طاعَة من ذُّل من وجل
أمْرُق حشاي قِدَّامهْا يلْمَع بالوجع..
قُول ليهَا لمَّا الشوق يبين
ما بين ..شجيرات الأراك
والفرحَة تغْسِل طرْحتهْا
والبدر يمشى على الهلاك
والخوف يكون لسَّع جَنين
في رُكْنِ من ساحة الوَّلَه
في زاويَة من ساعة الحنين
ما بين دِى ارْضَك ودَاكْ سَمَاك
العُمْدة منْتظْرِك هِناك
ومِن هِناك درْبَك عديل
نادِى المُدرِّس وَدْ خَدوم
والمديرِس وَدْ خدوم
العُمْر مربوط بالجرَس
والصبْرِ مشْنوق الضُحى
والخوف نَزَل من غير حَرَس
والعُمْدة فوق كل الأصول
لمْلًم جِرايواتُو وجَلَس
عُمدة فوق كل الفصول
في التلاميذ في الطباشير
في التعابير في النَّفَس
يا طه يا
يا إنتَ يا يا ودْ خدوم
ملعون أوهو الكان ده يوم
الإنتَ عريان وقَّفَك
والعمدة قدَّامك رَفَس
وعليكَ إنتَ براك تخمّن
هل تكّلم أم تنَحْنَح أم عَطَس
والعُمدة قال:
يا إنت يا ..
يا طه يا
يا ودْ خدوم
أنا عندي إنتَ براكَ كوم والحِلَّة كوم..
يَاخ ديل بَقَر في أحْسن الأحوال غجَر.
أنْسَانى من كومَة هدوم
مشْرورَة في الطين والهموم
ما حاتَنْشَف حتى لو نِشِف البحر
والنساوين والغيوم
ما حاتَنْشَف ..ما حاتَنْضَف ما..
و العمدة فوق راسك هتف:
(مسئول كبير زاير البلَد
وانتَ يا طه العِماد..
إنتَ الفهَم إنتَ السنَد
لِمَّ الصغار
وزِّع عليُهم كلِّ واحد فَرْد ..فَرْد
الفرحَهْوافرُش سِكّتْهم مرات طراوَة و..
مرّة وَرْد
ولمَّا يهتفوا في الفصول
يحيا ويدوم عاش البطل
ما يكون هُتاف
من أىِّ فَم يطْلَع زَخم يطْلَع زبَد
تنْهدَّ حيشان البيوت
والفرحَة في أحسَن مزاج
لا تْخَلِّى دابَة..ولا تُرابَة ولا أحد
هل انتهى يا ربي زيَّاك العَمَد
يا ود خدوم
وانت سايس للعقول
دَه عليكَ إنت بَراك بعْرِف:
هل تقدّم أم تزحْزَح أم جَمَد
والمديرِس ودْ خدوم
مع إنّو في حلْقُو مو عَلّق
كُلَّ أجراس المدارِس
كلَّ صوت في الدنيا عابِس
بِرَجْفَة لصَقَت في سُنونو
كلُّ رجفات المساكين والعواجيز والعوانِس
صوت بيتْعرَى ويضِيع ويلمُّو صوت تَرْيان.
ولابِس..
وصرخْتَ يا طه وصرَخ
ضُل المشاوير في الأصيل
في الساحَة رفَعَت مُقْنَعهْا
الذِّلَة ... والصبر الطويل
رقَصَت مع الكلمات شُجون
وجَرَت ورا الأحرف خُيول :
"يا عُمْدة هوي"
حامت على الناس القَماري
وزّعَتْ سَعَف النخيل..
" يا عُمدهْ هوي"
مَشَت سحابَة
وجات ربابَة وزفَّة قامت
في الطبول
"!!يا عمدة هوي"
الغافي فارق غَمْدَتُو
والصاحي تَمْتَم في ذُهول
قام ودْ خدوم
"يا عُمْدة هوي"
يا عُمْدة بالله إخْتَشِي ..
للعوْرَة ما بِنْفَع هُتاف
للسوسَةْ ما بْفِيدَك حَشِى
علّمْتَنا الجري فوق جروحنا
وقلتَ : أبداً دَه المَشِي
خَتْيتْنَا في قلب المشاكل
وصِحنا كُلّنا
" مافى شِي كلمَهْ واحدَهْ
جناب سعادتَك
من ضمير ما مُرتَشِي
الحِلَّة يا .."
و العمدة ..أو سلطانو قام:
"الحِلَّة أيه..؟
حتَّة مُعلم مُبتدىء ..
الحِلَّة أيه
مسئول كبير زاير البلد
لا ودْ خَدوم ولا ألفِ شُوم
أو ألف بوم
حيَعَلِّم الوِّز كيف يعوم"
و العمدة جابِر..
دَه الصباح
مدَّ إيدو علي الدفاتر
وقبلما ما ينْصَر جبينو
كان شطب كلَّ المساخِر
اللِّي حاضِر من مساخِر
والمُسافِر
ما عدا السجن العُمومي
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
(العمدة جابر ود خف الفيل
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: الأدب والشعر :: الشاعر عمر الطيب الدوش-
انتقل الى: